Sevilla raporton se një prej lojtarëve të saj ka rezultuar pozitiv me Covid-19. Sipas të gjitha gjasave, ai do ta humbasë së paku ndeshjen kundër Romës më 6 gusht, e vlefshme për 1/8 finale të “Europa League”. Klubi i La Liga-s nuk e ka zbuluar ende emrin e lojtarit të prekur, ndërkohë që ai është izoluar.
Skuadra e Lopetegui u rikthye në stërvitje të dielën e kaluar dhe pas këtij rasti me koronavirus, siç e do protokolli, do t’iu nënshtrohet dy tamponëve radhazio për të kontrolluar nëse ka edhe të tjerë të infektuar, lojtarë apo pjesë e stafit. Kjo është deklarata e Sevilla:
“Sevilla FC raporton se pas testeve PCR, të kryera të dielën e kaluar te lojtarët, stafi stërvitor dhe pjesa tjetër e klubit, rezultatet e të cilave u morën mesditën e së hënës, 27 korrik, një lojtar i ekipit të parë rezultoi pozitiv me Covid-19. Personi i prekur është asimptomatik, me shëndet të mirë dhe është izoluar në shtëpi.
Sevilla FC menjëherë ka njoftuar të gjitha autoritetet kompetente sportive dhe shëndetësore për këtë rrethanë, ka izoluar personin e infektuar, ka pezulluar përkohësisht trajnimin e ekipit si masë parandaluese dhe ka kryer detyra dezinfektimi në ambiente, duke ndjekur rreptësisht protokollet e vendosura për këto situata.
Që nga dalja pozitiv e këtij rasti, klubi ka kryer tashmë dy kontrolle të reja individuale PCR në pjesën tjetër të grupit. Herën e parë, të gjitha testet e kryera kanë qenë negative. Rezultatet e testit të dytë do të publikohen mëngjesin e së enjtes, sepse janë kryer sot.
Sevilla FC planifikon të kthehet në stërvitje, individualisht dhe me të gjitha masat e zbatueshme, të enjten pasdite, me kusht që rezultatet e testit të dytë të kryer të jenë negative. Sevilla FC do të raportojë menjëherë çdo zhvillim të ri në këtë drejtim”.
