“Dje patëm një stërvitje të shkëlqyeshme, pas tri javësh pushim. Jemi të lumtur që jemi këtu, duam ta rifillojmë udhëtimin pikërisht ashtu siç e përfunduam sezonin e kaluar. Jemi shumë të karikuar”. Hakan Calhanoglu foli kështu në mikrofonat e televizionit të klubit kuqezi, në hyrje të qendrës sportive “Milanello”.“A jam lojtari më i mirë i muajit korrik në Serie A? Merita i shkon ekipit, të gjithë kemi punuar shumë mirë, – shtoi mesfushori turk. – Sidoqoftë, unë mund të luaj edhe më mirë, dua të vazhdoj të përmirësohem”.
Në këtë start të përgatitjeve për sezonin e ri foli edhe presidenti Scaroni: “Për stadiumin e ri jam optimist. Me administratën komunale kemi arritur një pikë mirëkuptimi. Nnuk është saktësisht ajo për të cilën kemi shpresuar, por e pranuam atë. Kryetari i bashkisë dhe mazhoranca e këshillit bien dakord të fillojnë me projektin, madje edhe kundërshtarët janë shprehur pozitivisht. Unë mendoj se shumica e forcave politike milaneze janë në favor të stadiumit të ri. Për ne është e rëndësishme. Të imagjinosh një Milan me 60-70 milionë të ardhura më shumë çdo vit, hap horizonte të reja për t’u kthyer në lavditë e së kaluarës”.
Scaroni pastaj foli për aspektin sportiv të kuqezinjve: “Çfarë pres për sezonin e ri? Do të isha i lumtur nëse Milani luan si në periudhën pas Covid-it. Në verë treguam një futboll të këndshëm, me rezultate shumë positive. Jemi një nga ekipet, që u paraqitëm më mirë. Ta nisim aty ku e lamë sezonin e kaluar. Mendoj se do të kemi stadiume të hapura (me tifozë) vetëm kur të dalë vaksina kundër koronavirusit. Askush nuk e kishte provuar ndonjëherë një situatë si kjo e shkaktuar nga Covid-19. Për sa kohë që nuk ka vaksinë, gjysma e zgjidhjeve mund të gjenden, por jo të kemi tifozët në shkallët e stadiumeve. Sidoqoftë, unë mendoj se para fundit të vitit, vaksina do të jetë gati. Prandaj jam optimist që stadiumet do të mbushen përsëri së shpejti”.
