Çifti i momentit, i formuar nga Neymar dhe Mbappé, nuk mundi ta fitonte finalen e parë të Ligës së Kampionëve si futbollistë të PSG. Braziliani e ka provuar këtë më 2015, te Barça. Si ky duet yjesh ka shumë përgjatë historisë së kompeticionit, që nuk mundën ta ngrinin trofeun e madh kontinental, përkundër parashikimeve se ishin favoritë një vit apo një tjetër. Maradona me Schuster ose Careca; Ronaldo me Raúl; Romario me Stoichkov; Platini me Laudrup, janë pjesë e disa çifteve të klasit të lartë, të cilët nuk mundën ta shtonin në “palmaresin” e tyre Kupën Europiane ose Ligën e Kampionëve, në varësi të emrit të kohës.
ZIDANE-DEL PIERO
Nga 1996, Juventusi arriti të bëjë bashkë Zidane dhe Del Piero. Trajneri aktual i Real Madridit ishte mesfushor, ndërsa italiani sulmues i dytë, gjithmonë pas sulmuesit kryesor. Me kësi emrash, ishte logjike që “Zonja e Vjetër” të niste sulmin e ri për majat e Europës. Sidoqoftë, ai Juventus humbi dy finale të Champions-it, me një duet gati perfekt. Në vitin 1997, ata u mposhtën pothuajse befasishëm ndaj Borussia Dortmund 3-1, ndërsa më 1998, Real Madridi i la pa titull (1-0), falë golit të Mijatovic në Amsterdam.
ROMARIO-STOICHKOV
Më 1993, Barça e Cruyff u përforcua në përpjekjen e saj për të mbrojtur titullin e “Wembley” të vitit 1992. Nënshkrimi i Romario përfaqësonte konsolidim të fuqisë sulmuese për skuadrën katalanase, e cila tashmë kishte Stoichkov në radhët e saj. Bullgari ishte me të gjitha fuqitë, ndërsa braziliani i paparashikueshëm, me një arsenal të pakufizuar lojrash. Më 1994, Barça arriti në finalen e Athinës si favorite kundër Milanit, por humbi përballë Baresi me shokë. Ekipi italian hyri në histori dhe mposhti Barçën 4-0. Kjo ishte e vetmja finale e Ligës së Kampionëve për duetin në fjalë.
RONALDO-KAKÁ
Katër sezonet (2009-2013) përkuan në Madrid brenda megaprojektin e Florentino Pérez, i cili u kthye si president. Të dy ata e kishin fituar Champions-in veçmas. Portugezi te Manchester United, ndërsa braziliani te Milani. Cristiano ishte gjithnjë në nivel shumë të lartë, ndërsa Kaká alternoi periudha të ndritshme me të tjera gri. Në sezonin e tyre të parë, ata u eliminuan nga Lyon. Më pas vijuan edhe tri sezone, duke siguruar një gjysmëfinale Champions-i përpara se dueti të shpërndahej dhe Cristiano të fillonte mbretërimin e tij në Europë.
SCHUSTER-MARADONA
Më 1982, Barça tërhoqi vëmendjen e planetit të futbollit me nënshkrimin e Maradonës. Argjentinasi erdhi në një ekip të udhëhequr nga Schuster, kampion europian me Gjermaninë. Aventura e “10” argjentinase në Barcelonë zgjati dy vite dhe në to ai nuk arriti të fitonte La Liga-n. Ky trofe ishte mënyra e vetme për të luajtur Kupën e Europës, sot Champions. Ky duet mbeti pa e provuar shijen e fitimit të trofeut më të rëndësishëm për klube në kontinent.
RONALDO-RAÚL
Më 2002, Florentino Pérez shtoi një tjetër yll në galaktikën e Real Madridit. Ronaldo erdhi nga Interi, iu shtua Figos, Zidane dhe Raúl. Me këtë të fundit, braziliani formoi duet për katër sezone. Koordinimin më të mirë e patën në sezonin e tretë, por jo aq “vdekjeprurës” sa supozohej. Në atë periudhë, skuadra e bardhë nuk arriti dot në finale të Ligës së Kampionëve. Më e shumta ishte gjysmëfinalja e humbur ndaj Juventusit më 2003.
HEYNCKES-SIMONSEN
Borussia Mönchengladbach e viteve 1970 i duhej Kupës Europiane për të mbrojtur momentin më të mirë në historinë e tij. Pas fitimit të pesë titujve të Bundesligës karshi Bayernit të Beckenbauer me shokë, skuadra e udhëhequr nga Alan Simonsen dhe Jupp Heynckes fitoi Kupën UEFA më 1975. Me partnerë yjor si Bonhof, Vogts dhe Stielike, kjo skuadër arriti në finalen e Kupës Europiane më 1977. Liverpool e mundi atë 3-1 në Romë. Kjo ishte finalja e t vetme e Kupës Europiane për këtë duet. Më 1979, Simonsen nënshkroi për Barçën.
LAUDRUP-PLATINI
Danezi, tashmë i konsideruar si një nga talentet më të mëdha të Europës, arriti te Juventusi i Platini më 1985, pas finales tragjike të Heysel. Dy vite përkoi me francezin, në të cilat klubi torinez mund ta kishte pasuruar “palmaresin” e tij, por nuk ishte e mundur. Në edicionin 1986-1987 u eliminua në Torino nga Real Madridi në një finale dramatike, që u zgjidh nga gjuajtja e penalltive. Laudrup më vonë do ta fitonte Kupën Europiane në “Wembley” me Barçën.
FALCAO-TONINHO CEREZO
Falcao dhe Toninho Cerezo, të dy brazilianë, u takuan te Roma nga viti 1983 deri më 1985. Ata kishin mrekulluar në Kupën e Botës 1982, në Spanjë, pavarësisht se nuk e fituan titullin. Në Kupën e Europës (Champions) 1984, skuadra romake dukej e prerë për titullin. Finalja ishte në fushën e saj, ku priste një Liverpool që nuk ishte më aq i frikshëm. Sidoqoftë, skuadra angleze triumfoi. Pas barazimit 1-1, u desh goditja e penalltive, prej nga Roma humbi ndeshjen më të rëndësishme në historinë e saj.
