Sido që të shkojë, do të fitojë një francez. Më saktë, një parisien. Nuk është e thënë me fanellën e PSG-së. Në këtë Champions të çmendur veror, e vetmja siguri është se të katërta ekipet gjysmëfinaliste kanë lojtarë të formuar në klubin e emirit të Katarit. Viti 2020 në Champions është edhe hakmarrja e futbollit francez, jo më i etiketuar si thjesht kampionati që krijon talente.
BETEJË – Ai që e deklaroi një gjë të tillë është vetë Mbape, i lindur në periferi të Parisit, por futbollistikisht i rritur te Monako, përpara se të rikthehej në shtëpi me një çek prej 180 milionë eurosh. Sulmuesi 21-vjeçar nënvizoi përmes një cicërime në “Twitter” prezencën e PSG-së dhe Lionit në gjysmëfinale.
Mesazh i vlerësuar edhe nga drejtori sportiv i Lionit, Zhuninjo, i cili më pas kritikoi faktin që Liga 1 konsiderohet një kampionat i rangut të dytë. Edhe për këtë arsye, presidenti i Lionit, Zhan-Mishel Ola, ka deklaruar se është gati të trokasë në dyert e UEFA-s, së bashku me homologun Naser Al Khelaifi për të kërkuar katër vende në Champions dhe jo vetëm dy të sigurt, plus një në eliminatore.
PARISIENËT – Një sukses në finalen e 23 gushtit në Lisbonë do ta forconte kauzën e tyre, por sido që të shkojë do të ketë të paktën një parisien i cili do të festojë. PSG ka Kimpemben, produkt të akademisë së saj titullar në skuadër, zv/kapiten dhe emblemë e klubit ku erdhi në vitin 2005. Dje u përball me ish-shokun e skuadrës Nkunku, i cili u transferua te Lajpcigu verën e shkuar, duke hequr dorë nga ëndrra për të mbajtur një ditë shiritin e kapitenit të PSGsë së tij. Nga ku u largua edhe Koman që në 2014-ën. Fillimisht në drejtim të Juventusit dhe pastaj Bajernit, ku sot do të diskutojë me Lionin e Dembelesë, me të cilin fitoi, së bashku edhe me Kimpemben, një turne të rinjsh në Katar në 2012-ën.
AMBASADORË – Por në fund të ditës, futbolli francez ka fituar. Kolonia e Bajernit ka një tjetër talent francez, Kouasi, por edhe Pavar, Hernandez, ish-lojtarin e Lionit, Toliso dhe më pak të njohurin Kuisons. Te Lajpcigu ka tre francezë të tjerë: Upameçano, por edhe Mukiele dhe Konate, parisienë dhe tashmë edhe ambasadorë të një France kampione bote, por në kërkim të lavdisë edhe në nivel klubi.
