Edhe pak orë na ndajnë nga starti i sfidës mes Dinamo Tbilis dhe Tiranës. “Panorama Sport” mëson se futbollistët dhe stafi bardheblu janë izoluar në hotel duke respektuar në maksimum masat anti-COVID., duke shmangur çdo kontakt të mundshëm.
Pothuajse të gjithë futbollistët hanë në dhomë më vete, duke eliminuar grumbullimet. Korespodenti i “Panorama Sport” në Tbilis, mëson se nuk do të ketë tamponë para ndeshjes, teksa ato me shumë gjasa do të bëhen në fund.
Gjithashtu raportohet se presidenti Refik Halili ka kryer një analizë me ekipin disa orë para startit të takimit. Për pak minuta, ekipi do të niset drejt stadiumit, ku duhet të jetë i pranishëm 1 orë e 30 minuta para. Siç e kërkon tradita, nuk kanë munguar dhurat nga presidenti i Dinamo Tbilisit, për klubin shqiptar.
“Uroj më të mirën për ekipin, është e pamundur të jem në fushë”, ka thënë shkurtimisht Hoxhallari për “Panorama Sport”, duke mos e fshehur dëshpërimin për mungesën në ndeshjen ndaj Dinamos. Egbo ka vendosur që në vend të tij në krahun e majtë të luaj Ismajlgeci.
