Transferimi i David Silvës tek Real Sociedadi po vazhdon të shkaktojë polemika. Mesfushori spanjoll ishte shumë pranë kalimit tek Lacio ku do përfitonte 4 milionë euro në sezon, por në momentin e fundit dhe shumë surprizuese u zyrtarizua nga skuadra e Real Sociedadit.
Menjëherë pas këtij zyrtarizimi drejtori sportiv i Lacios, Igli Tare tha se nuk e respektonte si njeri Silvën por vetëm si lojtar. Në lidhje me këto fjalë ka reaguar babai i David Silvës. “Kishte bisedime me Lacion por edhe me Real Sociedadin dhe ekipe të tjera. Nuk kishte asnjë marrëveshje të arritur me Lacion. David është i surprizuar me reagimin e Lacios. Secili mund të zgjedhë çfarë të dojë.
Lacio foli me agjentin e Silvës, jo me vetë Silvën. Nuk e kuptoj pse po e bëjnë kaq të madhe kur djali im nuk kishte arritur asnjë marrëveshje me Lacion”, tha babai i David Silvës për radio “Marca Donostia”.
