Eduart Rroca nuk është më futbollist i Kukësit. Mesfushori dhe klubi verilindor kanë mbyllur me mirëkuptim bashkëpunimin mes tyre në mënyrë që lojtari të kalojë te skuadra turke Istanbulspor.
Në një komunikatë zyrtare, Kukësi njofton se ka pranuar dëshirën e Rrocës për t’u transferuar te klubi i kategorisë së dytë të futbollit turk.
Rroca bëhet një tjetër largim me peshë nga Kukësi pas Besar Musollit. Të dy lojtarët luajtën dje kundër Volfsburgut ndeshjen e fundit me fanelën e Kukësit.
27-vjeçari luajti më shumë se 1 vit e gjysmë me Kukësin. Ai fitoi Kupën e Shqipërisë në vitin 2019
Njoftimi i Kukësit
Mesfushori Eduart Rroca nuk është më pjesë e skuadrës sonë! Pas një sezoni e gjysmë me fanellën e Kukësit, mesfushori i ka dhënë lamtumirën klubit dhe ndeshja ndaj Wolfsburg, ishte e fundit për të me fanellën e Kukësit!
Futboll Klub Kukësi e falënderon Rrocën për kontributin e dhënë dhe i uron suksese në aventurën turke. Me fanellën e Kukësit, Rroca fitoi Kupën e Shqipërisë. Suksese Eduart!