Trajneri i Milanit Stefano Pioli paralajmëroi se mund të ndryshojë nesër formacionin bazë për sfidën e parë në Ligën e Europës kundër Sëlltikut.
Në konferencën për mediat, tekniku i “Djallit” u shpreh se fitorja në derbin e Milanos në fundjavë i ka kushtuar shumë energji ekipit të tij.
“Bëmë shumë punë duke kaluar raundet eliminatore për të arritur në fazën e grupeve. Tani dëshirojmë t’i shkojmë garës deri në fund. Derbi na kushtoi shumë energji mendore dhe fizike. Nesër do të kemi formacionin më të mirë të mundshëm, por nuk është e thënë që të jetë i njëjtë me atë të takimit me Interin. Jam i bindur se rezultati varet totalisht nga formacioni titullar. Kam në dispozicion futbollistë të fortë dhe me vullnet për të bërë shumë, si Zllatani ashtu dhe të tjerët”, deklaroi tekniku i Milanit Stefano Pioli.
