Për qendërmbrojtësin Edi Bojom, sezoni i ri që pritet që të nisë së shpejti e gjen Kastriotin si një skuadër mjaft të konsoliduar, që sipas tij do të jetë surpriza e këtij sezoni. Mbrojtësi nga Kameruni, në prononcimin e dhënë për “Panorama Sport” pohoi se drejtuesit e Kastriotit kanë punuar mjaft mirë në merkato, duke bërë disa afrime me eksperiencë.
“Jemi në kulmin e përgatitjeve, pavarësisht se javë pas jave kampionati po shtyhet. Kjo shtyrje na ka shërbyer, pasi disa nga lojtarët janë afruar me vonesë dhe përshtatja e tyre donte pak kohë. Tashmë, pas një muaji shtyrje, besoj se jemi gati për startin e sezonit. Kemi një skuadër të mirë, ndërthurje interesante që na bën një ekip mjaft të konsoliduar në çdo drejtim. Kastrioti mendoj se do të jetë surpriza e Superiores këtë sezon”, tha fillimisht Bojom.
Më tej mbrojtësi flet edhe për sezonin e tij të tretë në Krujë. “Unë kam qenë dhe më herët pjesë e kësaj skuadre, normalisht jam ndjerë mirë në Krujë ndaj edhe kam rinovuar. Në të vërtetë kam pasur disa oferta të mira në merkaton e verës, por vendosa të qëndroj në Krujë, pasi këtu ndihem si në shtëpi përfundoi Bojom.
MIQËSORE ME APOLONINË – Është konfirmuar miqësorja e fundjavës dhe Kastrioti do të presë të shtunën Apoloninë. Vendi i zhvillimit të takimit ende nuk është vendosur, pasi në varësi të kohës do të vendoset edhe ku do të luhet. Stadiumi “Redi Maloku” dhe kompleksi i FSHF-së në Kamzë janë destinacionet e mundshme për këtë test.
