Dëmtimi i futbollistit brazilian Fabinjo e lë Liverpulin me vetëm një mbrojtës Xho Gomez. Braziliani rezistoi vetëm 30 minuta ndaj danezëve të Midtjalndit sonte në mbrëmjen e Ligës së Kampioneve.
Ai u zëvendësua nga i riu Ris Uilliams, i cili do të ketë vendin e titullarit deri në momentin që do të rikuperohen qendërmbrojtësit e tjerë Zhoel Matip, Fabinjo dhe Van Dajk.
Por, situata mund të bëhet akoma më e vështirë teksa Klop shtoi se dëmtimi i Fabinjos nuk dukej aspak i lehtë.
“Fabinjo ndjeu tërheqje muskulare dhe nuk ishte diçka e mirë. Ai tha se mund të luante, por nuk mundi të bënte asnjë sprin. Matip? Nuk e di se kur do të rikthehet. Po interesohemi vazhdimisht siç mund ta imagjinoni”, deklaroi Klop pas fitores 2-0 ndaj Midtjlandit në Ligën e Kampioneve.
Holandezi Virxhil Van Dajk pritet të mungojë për një kohë të gjatë pasi ka këputur ligamentin e gjurit në sfidën 2-2 me Evertonin në kampionat. Ai do t’i nënshtrohet operacionit dhe pritet të mungojë për pjesën më të madhe të sezonit.