Milani rikthehet të luajë grupet e Europa League. Hera e fundit ishte me Gattuso në stol në vitin 2018. Kuqezinjtë luanin ndeshjen e fundit ndaj Olympiacos, duke u eliminuar. Trajneri Stefano Pioli kërkon vëmendje, duke mos e injoruar kupën europiane, megjithatë, ndeshjet e afërta dhe kalendari i ngjeshur, shto këtu mungesat, bëjnë që të ketë pak rotacion dhe ndryshime në formacion.
Kështu, për natën e sotme ndaj Celtic në Skoci, trajneri kuqezi sipas “Sky Sport” po mendon për pesë ndryshime!
Kundërshtari quhet Celtic dhe karakterizohet nga një aftësi e madhe drejtimi dhe forcë fizike. Arsyeja pse trajneri Pioli po mendon për një ndryshim masiv vjen për të përballuar lodhjen pas derbit të së shtunës.
Ndeshja kundër Interit i mori energji kuqezinjve, si fizike ashtu edhe mendore. Nga minuta e parë pritet të aktivizohen Diaz, Castillejo, Tonali, Dalot dhe Krunic, që është ende në balotazh deri në fund me Rafael Leao. Calhanoglu (i dëmtuar), Saelemaekers, Bennacer dhe Calabria në stol.
