Miralem Pjanic arriti te Barcelona këtë verë, pas katër sezonesh te Juventusi në Torino. Mesfushori boshnjak, i cili u vlerësua me 60 milionë euro, në këmbim të Arthur Melo, pranoi në ditën e prezantimit të tij se ishte duke përmbushur një ëndërr, duke veshur fanellën e Barçës. Tani, muaj më vonë, dhe në funksion të aktivizimit të tij të vogël, që ka pasur deri më tani, Pjanic, 30 vjeç, e bën të qartë se nuk ka ardhur në “Camp Nou” për një shëtitje.
Në një intervistë në “Canal + France”, Pjanic i ka bërë të qarta synimet e tij në klubin katalanas: “Unë nuk jam i kënaqur me të qenurit te Barça, por dua të lë shenjë këtu. Jam në klubin më të mirë në botë, ku përdoret stili i lojës që kam dashur gjithmonë. Megjithatë, ende nuk jam i kënaqur. Dua të kem mundësinë të fitoj tituj të rëndësishëm. Të qenurit te më të mirët dhe të fitoj tituj të rëndësishëm, ky është qëllimi im”.