Liverpool e kishte siguruar kualifikimin, por donte ta mbyllte grupin e Champions League me një fitore ndaj ekipit modest në Midtjylland. Megjithatë, sfida është mbyllur 1-1.
Pas avantazhit fillestar të Salah, vendasit nuk janë dorëzuar dhe kanë barazuar edhe falë VAR-it. Teknologjia ka ndërhyrë disa herë, por ka qenë shumë e ngadaltë.
Të paktën kjo është ajo që beson Jurgen Klopp. Trajneri i Të Kuqve ka bërë polemika në lidhje me përdorimin e VAR-it.
“Është dashur shumë kohë për të vendosur”, ka thënë trajneri i Liverpool-it. “Nuk i kam parë përsëritjet, kështu që nuk e di nëse kishin të drejtë apo nëse kanë gabuar. Por janë dashur 3-4 minuta dhe me këtë të ftohtë bëhet e vështirë dhe e rrezikshme për futbollistët”.
“Kam qenë një nga ata persona që kanë thënë ‘po, VAR është një ide e mirë’. Por nëse duhet të jem i sinqertë, nuk jam i sigurt nëse do ta thoja përsëri. Tani e kemi dhe duhet të bashkëjetojmë me të dhe ta pranojmë”.