Mund të ketë një vals mesfushorësh në merkaton e verës. Xhorxhino Vajnaldum është një nga lojtarët që Ronald Kuman e do patjetër te Barcelona dhe ai nuk ka ndërmend që të rinovojë kontratën me Liverpulin.
Duke nisur nga 1 janari, Vajnaldum ka të drejtë që të zgjedhë skuadrën e ardhshme dhe të bisedojë me një tjetër ekip. Të gjitha rrugët e çojnë në Katalonjë dhe Liverpuli tashmë e ka të pamundur që ta ndalojë. Në merkaton e verës, holandezi mund të “përqafojë” trajnerin Kuman, me të cilin ka punuar në kombëtare.
Nga ana tjetër, skuadra e Jyrgen Klopit nuk po rri duarkryq, por është në sulm për një tjetër mesfushor. I piketuari nga trajneri dhe drejtuesit e kampionëve të Anglisë është Renato Sançes. Në këtë sezon është duke shkëlqyer tek ekipi i Lilës dhe ka tërhequr vëmendjen e gjigantëve anglezë. Pak sezone më parë ishte pjesë e Bajernit, por nuk shkëlqeu në Bundesligë. Këtë herë mund të ketë një tjetër shans të artë për të luajtur në nivele të larta.
