Davor Suker, ish-lojtar i Real Madrid, ka folur për beIN Sports dhe ka analizuar periudhën e vështirë të Los Blancos, që do të luajë për gjithçka në një javë.
Do të luajë për kualifikimin në 1/8-at e Champions League kundër Borussia Monchengladbach dhe në La Liga kundër Atletico Madrid.
Kroati ka analizuar situatën dhe ka gjetur edhe trajnerin e ardhshëm të madrilenëve: Raul.
“Mendoj se Raul mund të jetë një trajner i madh për Real Madrid. Futbolli është si një cikël i hënës dhe nuk është e lehtë të jesh gjithmonë në maksimum. Zidane mund edhe ta mbyllë sezonin dhe mund të ketë edhe forcën që të marrë ndonjë titull, edhe pse Atletico i Simeone-s më duket shumë mirë”.
“Por, më pas, do të jetë radha e Raul. E di shumë mirë se çfarë është Real Madrid, i njeh dinamikat, ambientin dhe është i vetëdijshëm se çfarë mund t’i duhet skuadrës, shpresoj ta shoh shpejt në stol”.
Me Raul, te Real-i mund të shkojë edhe Mbappe. Suker është i bindur:
“Sa herë që flas me disa futbollistë të rëndësishëm, them gjithmonë të njëjtën gjë. Në futboll qarkullojnë shumë para, por nëse një lojtar nuk e do një klub, ai klub nuk do të arrijë kurrë ta marrë”.
“Në rastin e Mbappe, kam kuptuar qartë dëshirën e lojtarit për Real Madrid. Nuk jam një menaxher, por mund të flas për ndjesitë që më ka përcjellë lojtari”.