Interi nuk ka mundësi të dështojë në ndeshjen e fundit të fazës së grupeve të Ligës së Kampionëve. Për të festuar kualifikimin në 1/8 finale do të duhet vetëm fitorja në “San Siro”, kundër Shakhtar Donetsk, një kundërshtar i ashpër, që sapo ka “nokautuar” Real Madridin.
Antonio Conte foli gjatë konferencës së zakonshme për shtyp, duke iu referuar disa mungesave, që goditën mesfushën në orët e fundit: “Situata në mesfushë nuk është më e mira. Ne do të bëjmë disa vlerësime, do të përpiqem të bëj zgjedhjet më të mira për Interin. Nesër do të shihni se cilat do të jenë ato”.
Me një barazim midis Real Madridit dhe Borussia Moenchengladbach, Interi do të mbetej jashtë Ligës së Kampionëve, pavarësisht rezultatit kundër ukrainasve. Sidoqoftë, teoria e “biskotës” nuk pranohet më së paku nga trajneri zikaltër: “Ne duhet të shohim realitetin e fakteve dhe të fitojmë ndeshjen tonë. Kemi probleme të rëndësishme, do të duhet të jemi shumë të mirë për të përballuar edhe disa pengesa. Një javë më parë, para ndeshjes me Borussia, ishim të vdekur. Tani kemi parë një dritë në fund të tunelit. Ne po flasim për fushën e blertë, do të doja që askush të mos na ngacmonte me teorinë e “biskotës”. Të gjithë do të luajnë për të fituar ndeshjen e tyre”.
Hapësira për përmirësim është jashtëzakonisht e madhe për një ekip që është rritur kaq shumë gjatë një viti e gjysmë: “Një rrugë ka filluar dhe ne po përpiqemi ta çojmë përpara në mënyrën më të mirë të mundshme, duke përmirësuar gjithçka. Patjetër, kemi hapësirë për t’u përmirësuar”.
Ndeshja e parë me ukrainasit përfundoi 0-0, shumë raste nuk u kapitalizuan nga Interi brenda 90 minutave: “Shakhtar është një ekip i shkëlqyeshëm, i stërvitur nga një trajner shumë i mirë. Të luash kundër tij nuk është kurrë e lehtë. Është ndeshja e tretë kundër tyre në një kohë të shkurtër. Kundërshtari ka dy nga tri rezultate në dispozicion, ne vetëm një, që është fitorja. Do të përpiqemi ta marrim atë”.
Prania e Barella është në rrezik, ndërsa Vidal, sigurisht i padisponueshëm: “Arturo nuk është i disponueshëm, marrja e rreziqeve do të nënkuptojë zgjatjen e kohës së rikuperimit dhe ne nuk mund ta përballojmë këtë. Na vjen keq që nuk do të jetë, por fituam kundër Borussia edhe pa të. Ne do të luajmë si një ekip i shkëlqyeshëm, duke kompensuar mungesat”.
