Asistenti i trajnerit Edi Reja te Shqipëria, Serxho Porrini, beson se portieri i Shqipërisë Tomas Strakosha do të jetë sërish titullar te Lacio. Në një intervistë të shkurtër për “Tuttomercatoëeb”, ish-futbollisti juventin theksoi se te Lacio duhet të bëhet e qartë nga trajneri Simone Inzagi se cili do të jetë portieri i parë.
“Strakosha ka humbur vendin e titullarit – Ai ka patur disa vështirësi për sa i përket aspektit fizik. Ka kaluar ‘COVID’-in dhe nuk është kurrë e lehtë të rifitosh vendin e titullarit. Mendoj se është thjesht një moment. Në fakt, Pepe Reina (portieri i dytë i Lacios) nuk më duket aq fenomenal, sidomos në Ligën e Kampioneve. Shpresoj që Strakosha të kthehet si portier i parë te Lacio.
Ai nuk duhet të demoralizohet, por të vazhdojë të stërvitet normalisht. I vetmi shqetësim për mua është kur shikoj kaq shumë konkurencë për portën, në fund të fundit nuk i bën mirë askujt. Roli i portierit duhet të përcaktohet në mënyrë specifike dhe duhet të ketë qartësi për rolet”, deklaroi ndihmëtrajneri i Shqipërisë Serxho Porrini.
