Jyrgen Klop ka mbetur i befasuar që është shpallur edhe këtë vit trajneri më i mirë i vitit 2020 nga FIFA (fitoi Premier Ligën), ndërsa kolegu i tij i Bajernit, Hansi Flik, fitoi çdo trofe të mundshëm në stolin e rekordmenëve gjermanë.
“Faleminderit, sinqerisht. Kam shumë njerëz për të falënderuar, mbi të gjithë trajnerët e mi. Nëse do ta dija që do ta kisha fituar unë, ata do të kishin qenë këtu me mua. Ajo që kemi bërë këto vitet e fundit është me të vërtetë speciale, është një kënaqësi e madhe”, tha Klop gjatë videokonferencës.
I pyetur nëse triumfi në Premier Ligë ishte më special se ai në Champions, gjermani tha: “Ajo që unë di është se të dy patën shije shumë të mirë. Për të gjithë tifozët e Liverpulit, ne mundëm t’u japim disa kënaqësi gjatë kësaj periudhe të vështirë. Por nuk do ta lija pas as trofeun e Ligës së Kampioneve. Të dy ishin fantastikë”
