Tottenham është kualifikuar në raundin pasardhës të Kupës së Anglisë pas fitores 5-0 të marrë kundër Marine, skuadër e kategorisë së tetë të futbollit anglez.
Spurs e kanë siguruar fitoren dhe kualifikimin me 4 golat e shënuar në harkun e 13 minutave në pjesën e parë.
Protagonisti i ndeshjes ka qenë Carlos Vinicius, autor i tre golave. Braziliani është bërë lojtari i parë që shënon një tregolësh në Kupën e Anglisë për një ekip të drejtuar nga Jose Mourinho që nga Frank Lampard për Chelsea-n në janarin e 2007-ës.
Dy golat e tjerë të miqve janë shënuar nga Lucas Moura dhe Alfie Devine. Ky i fundit, 16 vjeç e 162 ditë, është bërë lojtari më i ri që shënon në Kupën e Anglisë që nga George Williams për MK Dons kundër Nantwich në nëntorin e 2011-ës (16 vjeç e 66 ditë).