Mario Balotelli vijon të jetë protagonist dhe në ndeshjen e tij të katërt me fanellën e Monzës ka gjetur golin e dytë personal. SuperMario i ka dhënë një fitore jetike 0-1 ekipit të tij në një sfidë direkte për ngjitjen në Serie A ndaj Chievos.
Balotelli shënoi në minutën e 61-të, ku pasi mori një krosim perfekt nga ana e Donatit goditi saktë me kokë, duke mos i dhënë shpresa portierit vendas.
Kjo fitore falë Balotellit e ngjit Monzën në vendin e dytë të renditjes në Serie B, vetëm 2 pikë larg Empolit të vendit të parë. Kujtojmë se në Serie B, të drejtën për t’u ngjitur menjëherë në Serie A e fitojnë dy ekipet që renditen në vendet e para, ndërsa ekipi i tretë që ngjitet përcaktohet nga “play-off”.
