Klubi kampion i Kosovës, Drita u ka dërguar fanela të personalizuara për Grupin e Kumanovës, i cili vuan dënim me burg nga autoritetet maqedonase. Veprimi i Dritës ka gëzuar pjesëtarët e Ushtrisë Çlirimtare Kombëtare (UÇK).
Njëri prej të dënuarëve, Naser Bajraliu zbuloi “dhuratën” e marrë nga klubi i Dritës.
Grupi i Kumanovës njihet për përplasjen e armatosur në 9-10 maj 2015 në “Lagjen e Trimave” me policinë maqedonase. Nga shkëmbimet e vazhdueshme të zjarrit u vranë 10 militantë të UÇK-së, 8 policë maqedonas, ndërsa u plagosën 37 punonjës të rendit.
28 pjesëtarët e Grupit të Kumanovës u kapën nga policia maqedonase dhe u dënuan me burgime të rënda për “terrorizëm”. Megjithatë, është kërkuar të kryhet një hetim ndërkombëtar për dënimin e tyre.