Pas një pjese të parë sezoni me shumë ulje-ngritje, Reali nuk gjen qetësi edhe kur fiton. Kampionët në fuqi të Spanjës rrezikojnë të humbasin sërish mbrojtësin Dani Karvahal, i cili u detyrua të zëvendësohej sot në sfidën kundër Valencias në minutën e 28-të. Kjo situtatë ka vendosur në dilemë të madhe teknikun francez, Zinedin Zidan.
Pas fitores 2-0 kundër “Los Che”, 48-vjeçari u shpreh se nuk po arrin të gjejë arsye për krizën e vazhdueshme të dëmtimeve në kampin madrilen.
“Nuk e kuptoj. Ka shumë dëmtime te skuadra jonë dhe për këtë gjë jam shumë i shqetësuar. Është një goditje e madhe për ne sepse Karvahal është futbollist i rëndësishëm”, deklaroi tekniku francez.
Teksa po afron sfida e Ligës së Kampioneve kundër Atalantës në kuadër të 1/8-ave të kompeticionit, Reali është masakruar nga dëmtimet. Serxho Ramos, Marselo, Eder Militao, Federiko Valverdee, Eden Hazard, Rodrigo, Odriozola dhe Karvahal janë futbollistët e dëmtuar të “Los Blancos”. Deri në datën 24 shkurt, Zidan duhet të gjejë zgjidhje për formacionin që do të përballet me ekipin e Atalantës.