Ole Gunar Solskjaer është i kënaqur që skuadra e tij reagoi pas barazimit me Evertonin. “Mendoj se dominuam. Ishim në kontroll të plotë në pjesën e parë. Në pjesën e dytë u bë më shumë një ndeshje futbolli. Kur po fiton 1-0 dhe shpërdoron, gjithçka mund të ndodhë.
E dinim këtë nga Evertoni. Duhet ‘vrarë’ ndeshja, por në fund arritëm të kualifikoheshim. Është ky objektivi që kishim. Sigurisht që duam të fitojmë çdo ndeshje e të shkojmë në finale të këtij kompeticioni. Prandaj jemi Mançester Junajtid. Ndonjëherë duhet të kesh fat në short, ne nuk kemi pasur shumë fat, por natyrisht që bëmë një tjetër hap drejt finales”, tha tekniku norvegjez.
KONTRATA – Teknikut të “Djajve të Kuq” i kanë ngelur edhe 16 muaj kontratë në “Old Trafford”, por drejtuesit po mendojnë që t’i ofrojnë rinovimin edhe për 2 vite të tjera. Megjithatë, përpara se të ulen në tavolinën e bisedimeve, ata do të presin fundin e sezonit dhe kontrata e re do të firmoset vetëm në rast se Junajtid do të arrijë që të kualifikohet në katër vendet e para këtë sezon. Junajtid renditet në vend të dytë në Premier Ligë, -5 pikë nga kryesuesit e Sitit, por që kanë edhe një ndeshje më shumë në dispozicion.
