Supersfida Partizani-Laçi mbylli javën e 21-t të Kategorisë Superiore. Pas kësaj ndalese, lufta për titullin kampion është ashpërsuar akoma më shumë pas humbjes së kryesve të Vllaznisë përballë Tiranës. Megjithatë, humbja e shkodranëve në “Selman Stërmasi” nuk është shfrytëzuar maksimalisht nga rivalët e Partizanit, Laçit dhe Teutës, të cilët u mjaftuan me barazime këtë javë.
Me barazimin 1-1 ndaj Laçit, “demat” shkojnë në kuotën e 38 pikëve, 3 më pak se Vllaznia kryesuese. Teuta dhe Laçi vijnë më pas me pikë të barabarta (37). Durrsakët nuk ia dolën të fitonin me Kukësin (2-2) duke shpërduar një mundësi të mirë për t’iu afruar Vllaznisë.
Kukësi renditet në vendin e pestë me 30 pikë, ndërsa ndiqen nga kampionët në fuqi të Tiranës me një pikë më pak. Edhe pse barazoi pa gola me Apoloninë, Kastrioti qëndron komod në vendin e shtatë me 25 pikë, 7 më shumë se Bylisi në vendin e tetë (zona ‘play-out’).
Ballshiotët janë rikthyer fort në dy javët e fundit duke grumbulluar 6 pikë. Përkohësisht, skuadra e Dovedanit e sheh veten jashtë zonës së rënies nga Kategoria Superiore.
Apolonia dhe Skënderbeu plotësojnë renditjen në vendet nëntë dhe dhjetë, respektivisht me 14 dhe 13 pikë.