Gazeta “El Mundos” vazhdon të zbulojë më shumë detaje të kontratës së Leo Messit, më e madhja në historinë e sportit. Këtë të martë, kjo media zbulon ekskluzivisht klauzola të reja brenda kontratës, që argjentinasi ka. Barcelona, sipas “El Mundo”, kërkon që Lionel Messi, në këmbim të nënshkrimit të kontratës më të madhe në historinë e sportit, “të integrohet në shoqërinë dhe kulturën katalanase”.
Në artikujt e pikës së parë (1.2.7) të dokumentit të nënshkruar nga të dyja palët në nëntor 2017, për një shifër të mundshme prej 555.237.619 euro në katër sezone, klubi i drejtuar nga Josep Maria Bartomeu kërkon që futbollisti argjentinas të “kryejë maksimumin e përpjekjeve për t’u integruar në shoqërinë katalanase”. Barça, nga ana e saj, vuri në dispozicion të gjitha mjetet për ta përmirësuar qasjen katalanase të lojtarit të saj.
Kjo kërkesë ishte në të njëjtin nivel me “miratimin e një sjelljeje adekuate personale dhe ritmin e jetës katalanase”. Leo e pranoi atë, por u “blindua” në rast se Katalonja bëhej e pavarur (në atë rast, do të largohej falas). Për më tepër, ndeshjet e Kupës së Katalonjës nuk u konsideruan si zyrtare, kështu që ato nuk llogariten në kontratë. Këto ishin disa nga detajet më goditëse të kontratës së Messit, që vazhdon t’i zbulojë “El Mundo”.
