“Kam mësuar që në jetë nuk ka asgjë të sigurt”. Megjithatë, ka gjithmonë një por… “Në mendjen time kam vendosur një limit për karrierën time si futbollist dhe është qershori i vitit 2023. Por, mund të tërhiqem edhe për 4 muaj”. Duke e nisur nga fundi, Xhanluixhi Bufon” rrëfen jetën dhe karrierën e tij në një intervistë për gazetën angleze “The Guardian” duke konfirmuar mbi të gjitha që nuk është i përjetshëm. “Mendoj se një person që nuk bën gabime dhe nuk vuan pasojat, nuk do të mësojë kurrë. Vetes time i kam dhënë gjithmonë këshilla”, vazhdon më tej legjenda italiane.
MIKU- “Kujtoj gjithmonë si kam qenë dhe si jam tani. E rëndësishme është që ndonjëherë gjërat të shkojnë keq. Kur gaboj diçka në një ndeshje, dua që të përmirësohem dhe të jap më të mirën nga vetja”. Portieri i Juventusit ka një rol shumë të rëndësishëm në dhomat e zhveshjes dhe për trajnerin Andrea Pirlo. Dhe kjo gjë nuk është për miqësinë që kanë me njëri-tjetrin, por për rolet në një skuadër. “Përpara të tjerëve e thërras ‘mister’. Është çështje respekti dhe inteligjence, për aq kohë sa ai është trajner dhe unë do të jem lojtar. Pastaj kur të dalim nga këto role, mund të jemi Xhixhi dhe Andrea. Me të dhe me Gatuzon kam ndarë një pjesë të madhe të karrierës time, ku arritëm majat në fitoren e Botërorit në vitin 2006-të. Në fakt miqtë nuk gjykohen nga trofetë, por pa dyshim ajo eksperiencë në Botëror e bëri më të fortë lidhjen tonë”, thotë Xhixhi.
E PAKUPTUESHME – Në intervistë është folur gjithashtu edhe për atë që ka ndodhur në botë në vitin e fundit. Bufon nuk fshihet. “Muaji i parë i karantinës ishte i bukur për mua. Kam pasur kohë për veten, të cilën nuk e kam pasur kurrë në jetë. Kam pasur mundësinë që të qëndroja me bashkëshorten dhe fëmijët, të lexoja dhe të ndiqja pasionet e mia. Përfitova në ato çaste, por pastaj u bë gjendja shumë e rëndë. Kuptuam që duhet t’u japim vlerë gjërave të vogla. Tani kur rikthehem në shtëpi, nuk kam nevojë për asgjë. Jam thjesht i lumtur kur shoh njerëzit e afërm shumë mirë”, shton ai.
RIKTHIMI – “Kur Juventusi më propozoi rikthimin, mendova që ndoshta ishte një arsye për t’u rikthyer dhe një tjetër histori për t’u shkruar. Ndihem mirë fizikisht dhe nuk ndiej asnjë rënie siç të gjithë të tjerët thonë se mund të ndodhë kur vjen një moshë e caktuar”. Tani fjalën e ka fusha. A do të qëndrojë edhe dy vite apo edhe pak muaj?!
