Serxho Aguero ka vendosur për të ardhmen dhe në fund të sezonit do të largohet nga Mançester Siti, ku luan nga viti 2011. Për të siguruar shërbimet e argjentinasit janë në garë disa klube, teksa një nga këto është edhe Juventusi.
Kohët e fundit thuhet se bardhezinjtë duan me çdo kusht futbollistin dhe do të provojnë ta bindin për t’u bashkuar me ta. Por, me këtë nuk është dakord vëllai i legjendës argjentinase Diego Maradona, Hugo Maradona. Ky i fundit në një intervistë për “Radio Kiss Kiss”, e ka ftuar Agueron të bashkohet me Napolin, duke i thënë se do të formonte një treshe të frikshme në sulm me Mertensin dhe Insinjen.
“Unë fola me Janinën (ish-partnerja e Agueros), por nuk e pyeta për Agueron. Do ta telefonoj sonte dhe do ta pyes si po shkojnë gjërat. Do i them që nëse flet me Agueron, t’i thotë të vijë te Napoli, pasi këtu ka diell dhe det. Juventusi? Po çfarë Juventusi?! Hajde te Napoli. Imagjinoni treshen Aguero, Mertens, Insinje… Do të ishte një gjë e jashtëzakonshme ta shikoja në stadiumin ‘Diego Maradona’”, tha Hugo.
