Po me Europianin çfarë do të ndodhë? UEFA ka reaguar hapur për refuzimin e formatit të ri të Super Ligës së Europës, i cili tashmë është një realitet. Reali i Madridit, Barcelona, Atletiko, Milan, Juventus, Inter, Arsenal, Mançester Junajtid, Mançester Siti, Çelsi, Liverpul dhe Totenhemi janë 12 klubet që e kanë krijuar këtë.
Europiani do të luhet për 2 muaj dhe gazeta “MARCA” ka imagjinuar se si do të jenë ekipet kombëtare pa prezencën e futbollistëve të këtyre 12 skuadrave që mund të përjashtohen nga kompeticionet e UEFA-s.
SPANJA – “Furia e Kuqe” nuk mund të ketë disa lojtarë të rëndësishëm që kanë qenë prezentë në grumbullimet e fundit të Luis Enrikes. Lojtarë si De Gea, Serxho Ramos, Alba, Buskets, Koke apo Morata do të mbeteshin jashtë. Formacioni i Spanjës do të ishte krejtësisht me lojtarë të tjerë dhe shumë pak më i fortë sesa ai aktuali:
Unai Simon, Navas, Pau Torres, Injigo Martinez, Gaja, Fabian Ruiz, Mikel Merino, Serxho Kanales, Iago Aspas, Mikel Ojarzabal, Gerard Moreno.
GJERMANIA – Skuadra gjermane do të ishte ajo që do të ruante boshtin e saj duke qenë se Bajerni nuk ka pranuar të jetë pjesë e Super Ligës. Nuk do të ishin lojtarët si Ter Shtegen, Kros, Verner, Gyndoan apo Havers.
Megjithatë, formacioni i “Panzerave” do të ishte me Nojerin, Klostermanin, Ginterin, Tah, Emre Xhan, Gorecka, Kimish, Muisala, Draksler, Gnabri, Sane.
FRANCA- “Gjelat” nuk do të ishin një nga ekipet më të dëmtuara nga krijimi i Super Ligës, por sigurisht që do të kishin mungesa të rëndësishme si Loris, Varan, Pogba, Rabio, Kante, Grizman, Dembele, Zhiru.
Kampionët e botës do të kishin këtë formacion: Mandanda, Pavar, Kimpembe, Lukas Hernandez, Dinj, Auar, N’Zonzi, Kamavinga, Koman, Ben Jeder, Mbape.
ANGLIA – Pa dyshim, kombëtarja e “Tre Luanëve” do të ishte më e penalizuara nga përjashtimi i futbollistëve që janë pjesë e këtyre 12 skuadrave që krijuan Super Ligën.
Nga këto 12 skuadra, 6 prej tyre janë pjesë e Premier Ligës dhe mungesat janë të rëndësishme si Uoker, Stons, Meguajër, Tripier, Aleksandër-Arnold, Dajër, Fodën, Maunt, Sterling, Herri Kejn apo Rashford. Formacioni i Sauthgejt do të ishte ky: Pop, Arons, Kin, Koadi, Mings, Filips, Rajs, Uard Prouz, Lingard, Kalvert Ljuin, Sanço.
PORTUGALIA – Edhe kjo kombëtare do të kishte mungesa të rëndësishme, sidomos në repartin e sulmit. Mungesa e Ronaldos, Zhoao Feliks, Zhota, Bernardo Silva dhe Bruno Fernandesh do të ishin disa prej tyre, ndërsa formacioni do të ishte:
Rui Patrisio, Semedo, Fonte, Pepe, Guerreiro, Ruben Neves, Danilo, S. Oliveira, Neto, Andre Silva dhe Rafa Silva.
