Mbrojtësi i majtë i Atalantas, Robin Gosens, ka shkruar një libër autobiografik me titull ‘’Vlen të ëndërrosh’’ teksa ndan momentet më të lumtura dhe më të vështira të jetës së tij.
Në librin e Gosens, është shkëputur një paragraf ku ai tregon një histori të kaluar me Kristiano Ronaldon, ku rrëfen se si portugezi e kishte injoruar 26-vjeçarin kur ky i fundit i kishte kërkuar të ndërronin fanellat gjatë një përballje të Atalantës me Juventusin në vitin 2018.
‘’Ishte sezoni 2017-2018 dhe pas ndeshjes kundër Juventusit në kupën e Italisë, u përpoqa të përmbush ëndrrën time për të pasur fanellën e Kristiano Ronaldos. Pas vërshëllimës së fundit, nuk shkova me shokët e ekipit për të festuar, por shkova drejt Ronaldos.
E pyeta, Kristiano, a mund t’i ndërrojmë fanellat? Ai as nuk mi hodhi sytë, por vetëm tha: ‘Jo!’ Isha krejt i skuqur dhe i turpëruar. Unë u largova dhe u ndjeva si i vogël. A e dini atë moment kur diçka e turpshme ndodh dhe shikoni përreth për të parë nëse dikush e ka vërejtur? Kjo është ajo që unë ndjeva dhe u përpoqa të mos e jepja veten’’, shkruan mbrojtësi gjerman në librin e tij.
