Pesë futbollistë të tjerë të River Plejtit kanë dalë pozitivë me Koronavirus, duke e dërguar numrin total të lojtarëve të infektuar në skuadrën argjentinase në 20.
Klubi nuk ka asnjë nga katër portierët negativë për ndeshjen e së enjtes në Kupën Libertadores kundër kolumbianëve të Santa Fesë dhe ka kërkuar shtyrjen e ndeshjes. River Plejti lëshoi një deklaratë ditën e hënë ku thoshte se Lukas Beltran, Flabian Londonjo Bedoja, Gonzalo Montiel, Leonardo Poncio dhe Aleks Vigo ishin lojtarët e fundit që dolën pozitivë dhe iu bashkuan 15 rasteve të tjera që u zyrtarizuan të shtunën, përpara klasikes me Boka Zhuniorsin, ndeshje e vlefshme për çerekfinalet e Kupës së Argjentinës. Boka fitoi me penallti pas barazimit 1-1.
CONMEBOL u lejon skuadrave që të kenë 50 lojtarë. Riveri ka për momentin 32 në dispozicion, përfshirë edhe shumë emra të rinj.
