Pas Paratiçit, të gjithë në Torino janë të bindur se largimi i ardhshëm do të jetë ai i Kristiano Ronaldos.
Portugezi, i cili sapo ka bërë edhe një tjetër investim të madh të radhës, duke blerë një kat të plotë në Lisbonë, me vlerë 7.3 milionë euro, duket gjithmonë e më larg Juventusit, duke qenë se dje me postimin e radhës dhe me fjalët e përdorura në kohën e shkuar, duket se e ka mbyllur epokën bardhezi.
“Çdo gol që kam shënuar në karrierë ka qenë si rezultat i grupit. Gjithmonë! Prandaj, jam krenar që isha i pari në historinë e Juventusit që shënova më shpejt se kushdo tjetër 100 gola në Serinë A, me këtë fanellë fantastike mbi shpatulla, por në të njëjtën kohë jam krenar që për të 11-tin sezon shënoj të paktën 40 gola.
Dhe nuk ka përfunduar ende. Nga nesër (sot) nis një aventurë e re me Portugalinë dhe ne do të japim çdo gjë që kemi brenda vetes. Prandaj, forca, kemi një titull të madh për të mbrojtur”, shkruante Ronaldo.
