Ky sezon ka qenë me të vërtetë ndër më të bukurit, më të paparashikuarit dhe më të luftuarit në historinë e futbollit shqiptar.
Kur jemi vetëm tri javë nga fundi, janë ende shumë verdikte për t’u vendosur dhe një hap sadopak i vogël fals i ndonjë ekipi, mund t’i kushtojë sezonin.
Përveçse luhet për trofe, një vlerë të madhe ka dhe përfitimi ekonomik që presidentët e klubeve arkëtojnë pas përfundimit të sezonit.
Normalisht, lufta më e madhe bëhet për titullin kampion, pasi arkëtohen 100 milionë lekë nga FSHF-ja si dhe merr pjesë në Ligën e Kampionëve, ku merr direkt 1.2 milionë euro.
Teuta aktualisht ruan vendin e parë dhe në rast se shpallet kampione, arkëton 1.3 milionë euro.
Ndërsa, ekipet që renditen në vend të dytë dhe të tretë, si dhe fituesja e Kupës së Shqipërisë, do të marrin pjesë në Conference League, aty ku arkëtohen 250 mijë euro.
Për këto katër vende në Kupat e Europës, janë 6 ekipe që luftojnë: Teuta, Partizani, Laçi, Vllaznia, Tirana dhe Skënderbeu.
