Numri i infektimeve në Tokio është rritur përsëri gjatë 24 orëve të fundit, duke arritur në 714 persona, numri më i lartë që nga 26 maji. Për pasojë, qeveria japoneze dhe bashkia e Tokio po mendojnë të mbajnë një gjendje “gjysmë të jashtëzakonshme” deri në mesin e korrikut.
Dhe, në rast se kjo situatë do të vijojë ende, atëherë edhe java e parë e Olimpiadës mund të zhvillohet nën masa të rrepta sigurie prej pandemisë Covid-19. Rasti i delegacionit olimpik të Ugandës, ku 2 persona dolën pozitivë dhe i gjithë ekipi është në izolim, ka trembur organizatorët e Lojërave Olimpike.
Gjithashtu, po mendohet që numri i spektatorëve të lejuar në eventet sportive gjatë Olimpiadës të përgjysmohet nga 10 mijë në 5 mijë persona. Edhe transporti publik do të mbyllet ose do të jetë i limituar gjatë periudhës së Olimpiadës. Qeveria do të diskutojë për marrjen e masave të mëtejshme për të mos lejuar rritjen e rasteve të reja me koronavirus.
