Interi është në vështirësi ekonomike dhe për këtë arsye, klubi zikaltër duhet të sakrifikojë një ose dy lojtarë kryesorë për të rregulluar bilancet.
I pari që do të largohet me shumë mundësi është Açraf Hakimi, e ardhmja e të cilit do të vendoset brenda javës. Sipas asaj që raporton “La Gazzetta dello Sport”, largimi i marokenit nga Interi duket i pashmangshëm dhe do të jetë ai sakrifikimi i madh nga drejtuesit. Në garë për lojtarin janë dy klube, Çelsi dhe PSG-ja, me këta të fundit që janë favoritë për ta marrë, për një sërë arsyesh.
Oferta e Leonardos do të ishte vetëm para, zgjidhja e preferuar për drejtuesit e Interit. Gjithashtu edhe dëshira e lojtarit është të kalojë te francezët, ku do të përfitonte një rrogë prej 8 milionë eurosh në sezon dhe do të kishte mundësinë të luante me Nejmarin, Mbapenë dhe Di Marian, në të djathtë.
PSG-ja ka gati ofertën 70 milionë euro për Interin, ndërsa në krahun tjetër Çelsi mendon të ofrojë 50 milionë euro plus kartonin e njërit prej Zapakostës ose Alonsos.
Një largim tjetër nga Interi mund të jetë edhe Milan Shkrinjar. Drejtuesit e kanë vendosur dhe në rast se vjen një ofertë e kënaqshme për sllovakun, atëherë do ta pranojnë, teksa kanë piketuar edhe zëvendësuesin. Interi ndjek me kujdes situatën e Xhanluka Mançini dhe në rast largimi të Shkrinjarit, do të jetë ai zëvendësuesi.
Gjithashtu klubi ka Milano ka shfaqur interes edhe për Mateo Pesinan, i cili në sezonin e fundit shkëlqeu me Atalantën, ndërkohë që po bën mirë edhe me Italinë në Europian.