Kukësi është duke bërë përpjekjet për të siguruar marrëveshjen për afrimin e lojtarëve cilësorë në merkato dhe emri më i fundit që ka dalë në skenë është ai i Ardit Hilës. Mësohet se midis drejtuesve dhe elbasanasit ka pasur komunikime gjatë këtyre ditëve dhe mbetet për t’u parë nëse do të gjejnë gjuhën e përbashkët.
Eksperienca e 28-vjeçarit bën që në Kukës të tundohen për ta afruar, për më tepër që në karrierën e tij ka edhe një titull kampion me Partizanin. Madje, edhe për këtë futbollist verilindorët duhet të mundin konkurrencën e të kuqve, që gjithashtu kanë shfaqur interes për të.
SITUATA – Deri më tani Kukësi nuk ka bërë asnjë afrim në merkato, ndërkohë që largimet kanë qenë të shumta, duke e dobësuar mjaft skuadrën. Gjatë kësaj merkatoje disa lojtarë janë stepur për të bashkëpunuar me kuksianët, por gjithsesi nuk pritet të kthehet në problem afrimi i lojtarëve të tjerë. Synimi këtë sezon është titulli kampion dhe kjo arrihet vetëm duke afruar në organikë lojtarë që mbajnë mbi supe përgjegjësi për të realizuar këtë synim madhor.
