Kristian Toshevski mund të braktisë bardheblutë. “Panorama Sport” zbulon se mbrojtësi i Tiranës dhe i Maqedonisë së Veriut, Kristian Tosevski, është në listën e dëshirave të Ujpestit, skuadër që luan në Europa League këtë sezon. Kire Ristevski që luajti për ekipin kombëtar të Maqedonisë së Veriut në Kampionatin Europian, pjesërisht i mbajtur në Budapest, ende i përket Ujpestit në letër, por nga 30 qershori do të forcojë skuadrën e AEL të Limasolit në Qipro.
Me largimin e lojtarit, te hungarezët është bërë e domosdoshme për t’u përforcuar në prapavijë gjatë periudhës së transferimit të verës. Deri tani, Abdoulaye Diabi nga Mali ka mbërritur në mbrojtje dhe një tjetër lojtar i tipit mbrojtës ka të ngjarë të arrijë në Hungari. Sipas burimeve, Kristian Toshevski, mbrojtësi që ka luajtur 8 herë me ekipin kombëtar të Maqedonisë së Veriut dhe që i përket KF Tiranës, mund të jetë zgjidhja e skuadrës hungareze. 27-vjeçari ka një kontratë deri në verën e vitit 2022, kështu që Ujpest do të duhet ta blejë nga ekipi shqiptar, i cili përfundoi i pesti në kampionat sezonin e kaluar, tri pikë prapa vendit të katërt në Kategorinë Superiore. Toshevski këtë sezon ka qenë titullar në shumë ndeshje, duke filluar nga Champions-i dhe Europa League. Në Europë mbrojtësi i djathtë ka luajtur tri sfida dhe 270 minuta.
Në Superiore me Tiranën, Kristiani ka qenë në fushë në 29 takime dhe 2473 minuta. Nga ana tjetër, Najdovski, i cili ka luajtur më shumë se kolegu i tij, në Superiore ka shënuar 2 gola në 30 ndeshje dhe 2556 minuta lojë. Mes Kupës dhe Superkupës ka luajtur 131 minuta në dy sfida. Në Europë, ashtu si Toshevski, 270 minuta në tri takime. Kohët e fundit, nga Shqipëria, gjithnjë e më shumë lojtarë janë bashkuar me skuadra hungareze duke përfshirë Liridon Latifin (Akademia Pushkas), Hysen Memollën (Diosgjor), Naser Alijin (Honved) dhe Jasir Asanin. Në Ujpest, kontraktimi i futbollistëve të Maqedonisë së Veriut nuk histori e re. Përveç Ristevskit, Enis Bardhi, Viktor Angelov, Remzifaik Selmani kanë më parë qenë të punësuar me skuadrën hungareze.
