Djeg akoma, dhe shumë, eliminimi i Gjermanisë nga Europiani nga Anglia.
Humbja 2-0 e pësuar kundër Tre Luanëve ka sjellë shumë kritika për futbollistët gjermanë, edhe nga personazhe të rëndësishëm si Lukas Podolski.
Ish-sulmuesi i Gjermanisë ka komentuar për AS ndeshjen e skuadrës së Low, duke mos i kursyer kritikat për ekipin.
“Më përpara kishte një dëshirë dhe ambicie ndryshe. Një shpirt luftarak që sot mungon”, ka thënë Podolski në lidhje me Gjermaninë dhe lojtarët e kombëtares.
“Dukeshin të gjithë aq të zymtë. Kur shikon fytyrat e lojtarëve, asgjë nuk lëviz, nuk reagojnë ndaj asgjëje. Nëse do të kishte një zjarr në fushë, ata do të ishin akoma aty në vend”.
Në lidhje me Low:
“Low? Nuk mund ta gjykosh një trajner pas një ndeshje të vetme. Ajo që ka arritur Low për futbollin gjerman, askush tjetër nuk do ta bëjë pas tij. Por ndoshta trajneri i ri i kombëtares, Hansi Flick, mund ta kthejë skuadrën lart”, ka përfunduar ish-futbollisti.