Demoralizim dhe entuziazëm, nga njëri ekstrem në tjetrin. Nga njëra anë qëndron Gjermania dhe nga ana tjetër Italia. E vërteta është se “Pancerat” e Joakim Lëvit ishin ndër zhgënjimet më të mëdha të kësaj “Euro 2020”-e, duke i dhënë lamtumirën kompeticionit që në ndeshjen e 1/8- ave kundër Anglisë.
E gjitha kjo ka bërë jo vetëm që në rangun e përfaqësueses të nisë një revolucion me Hansi Flikun që do të pasojë Lëvin, por në të njëjtën kohë, ish-tekniku i Bajernit ka edhe një tjetër mision akoma më të vështirë: të rrisë adrenalinën dhe lidhjen mes tifozërisë dhe “Pancerave”. Ajo që e pasqyron më mirë këtë fakt lidhet me numrat e shitjeve të fanellave të kombëtares. Kompania “Adidas”, e cila kishte hedhur në treg një numër të konsiderueshëm, ka parë që stoqet të jenë shumë të mëdha, aq sa për të shpresuar në shitjen e tyre ka vendosur që të ulë me 50 për qind vlerën e saj.
Prandaj, nëse një bluzë përpara dhe gjatë “Euro 2020” vlente 130 euro, aktualisht mund të blihet për vetëm 65 euro. Një tjetër e dhënë që tregon zhgënjim është fakti se ende sot, bluza më e kërkuar është ajo e risisë Gësensit (2 asiste dhe 1 gol), ndërkohë që më pak e shitura është ajo e Tomas Mylerit, lojtarit që humbi rastin flagrant për ta dërguar në shtesën e mundshme ndeshjen me Anglinë.
Por, ndërsa nga kjo anë qëndron zhgënjimi i gjermanëve, në anën tjetër “Puma” deri në këtë pjesë të turneut ka pasur një fluks kërkesash të frikshme për bluza të Italisë. Deri më tani, fanella “axurre” është më e kërkuara dhe më e shitura, aq sa si rrjedhojë e kësaj urie, çmimi është rritur duke kaluar nga 110 në 140 euro, 160 euro madje për ato me emra të personalizuar të tifozëve.
