Pas fitores fantastike 5-1 fundjavë e kaluar, Mançester Junajtid është ndaluar në javën e dytë të Premier Ligës duke barazuar 1-1 me Sauthemptonin në transfertë. Ndeshja nisi mirë për vendësit, të cilët kaluan në avantazh nga një autogol i shkaktuar nga mesfushori brazilian i “Djajve të Kuq”, Fred.
Në pjesën e dytë ekipi i Solskjaerit arriti të reagonte duke gjetur barazimin me Grinud, pas një asisti tjetër të Pogbasë. Madje, për francezin ky është rekord më vetë, pasi arrin shifrën e 5 asisteve në dy ndeshje, si askush tjetër më parë. Por, pjesa mbetur e lojës ishte pa shumë histori, me të dyja skuadrat që në një moment u kënaqën të ndajnë nga një pikë. Sulmuesi kuqezi, Armando Broja, nuk ishte i grumbulluar me Sauthemptonin, ndërsa Solskjaer la përsëri në stol dy blerjet e reja, Varan dhe Sançon, me këtë të fundit që u aktivizua vetëm në minutën e 59-të të takimit.
OFERTË MEKENIT – Me sa duket, barazimi surprizë i Junajtidit nuk ka lënë një shije të mirë te trajneri Solskjaer, i cili ka kohë që këmbëngul për të pasur në skuadër një tjetër mesfushor. Dhe emri i ri në listën e shpenzimeve të norvegjezit është ai i juventinit, Ueston MeKeni. Amerikani ndiqet edhe nga Totenhemi, por klubi nga Mançesteri ka qenë i pari ai që ka plotësuar kërkesën prej 30 milionë eurosh që do Juventusi për ta lënë të lirë MeKenin.
