Sa herë që Masimo Morati kthehet të flasë për Interin, ka një interes të madh për vetë atë që ish-presidenti i ka dhënë botës zikaltër. Në një intervistë për mediat italiane, Morati foli mbi Inzagin dhe u ndal në emra të tjerë të përveçëm, nga Murinjo te Insinje.
INZAGI – “Simone me durim dhe inteligjencë ka gjetur lojtarë funksionalë dhe po shohim një lojë të bukur. Përqafimi me Korrean është dëshmi e ambientit që ka krijuar”.
MURINJO – “E ndjek kampionatin me shumë vëmendje. Zhoze i ka dhënë jetë Serisë A dhe e ka nisur shumë mirë duke i shtuar Romën garës për titull. Një si Murinjo nuk synon asnjëherë vendin e tretë, nuk do ta thotë kurrë, por do të jetë aty duke luftuar”.
SPALETI DHE INSINJE – “Spaleti është shumë i zoti dhe te Napoli ka lojtarë klasi, Insinjen mbi të gjithë. Mendoj se axurrët mund të luftojnë për titull, do të jetë një kampionat argëtues. Nuk e mohoj që do të doja shumë të shikoja Lorencon me fanellën zikaltër. Është talent dhe do të bënte shumë mirë”.
“INTERSPAC” – “Nuk e di nëse do të realizohet, por mendoj se e ardhmja e Interit do të bazohet te pasioni dhe një shoqëri ku aksionet i kontrollon populli, është pasion i pastër. Mendoj se koha ime ka kaluar”.
RONALDO DHE CR7- “Në Itali kaluan si Ronaldo dhe Kristiano. Janë futbollistë të ndryshëm, por fenomeni është mes 4-5 më të fortëve të historisë së futbollit. CR7 ka punuar shumë, e ka merituar atë që ka arritur, por nuk ka talentin e Ronaldos. Braziliani ishte një privilegj për t’u parë”.
