Tërbuni nuk e ka mbyllur me merkaton. I fundit që u është bashkuar, vjen nga Laçi. Bëhet fjalë për Endi Muratin, mbrojtësin që vjet u aktivizua te 21-vjeçarët e kurbinasve.
Lojtari i linjës së djathtë ka bindur edhe në ndeshjen testuese që u zhvillua me Murlanin, ndaj edhe pritet që të zyrtarizohet. Stafi teknik vazhdon të punojë me ritme të larta, ndërsa pret që ekipi të jetë gati për nisjen e kampionatit.
Seanca e paradites nis në orën 08:00 dhe përqendrohet në vrapimet e lehta në afërsi të bjeshkës, 2 kilometra larg qytetit. Ndërsa seanca e pasdites zhvillohet në stadiumin “Ismail Xhemali” të qytetit.
Trajneri Elvin Beqiri është i kënaqur nga të tijtë, ndërsa për gazetën thotë: “Merkatoja është ende e hapur dhe sidomos në sulm. Veç Hysës dhe Kekos, më duhet edhe një. Kampionati është i gjatë, ndaj le të marrim masa”, tha Beqiri.
