Partizani nuk ndalet në merkato, të kuqtë kanë zyrtarizuar afrimin e mbrojtësit të Kombëtares Shpresa, Albion Marku. Ashtu siç e kishte paralajmëruar dhe “Panorama Sport” ditën e sotme, 20-vjeçari vjen nga skuadra e Lokomotivës së Zagrebit në formulën e huazimit tek skuadra e Partizanit.
Gjithashtu Marku rikthehet në Kategorinë Superiore pas aventurës që ka pasur më parë me fanellën e Laçit. Mbrojtësi i djathtë është aktivizuar në 6 ndeshje me Kombëtaren U-21 nga ku debutimin e ka kryer në shtatorin e kaluar.
Lajmin e transferimit të Albion Markut tek Partizani e ka bërë vetë publike klubi i kuq me anë të një postimi në rrjetin social “Facebook” duke i uruar mirëseardhjen 20-vjeçarit.
NJOFTIMI I KLUBIT TË PARTIZANIT –
“ZYRTARE 🤝
ALBION MARKU FIRMOS ME PARTIZANIN
✍️FK Partizani zyrtarizon arritjen e marrëveshjes me Albion Markun. Mbrojtësi 20 vjeçar anëtar i ekipit përfaqësues U-21, mbërrin te 16-të herë kampionët e Shqipërisë me formulën e huazimit nga kroatët e NK Lokomotiva Zagreb. Marku rikthehet në kategorinë superiore pas eksperiencës pozitive me Laçin dhe do ti bashkohet skuadrës pas impenjimit me përfaqësuesen tonë U-21.
#MirësevjennëfamiljenekuqeAlbionMarku💪
#PërjetMeTyPartizan🔴”