Ndeshja e sotme e Milanit ndaj Bolonjës rezultoi më e vështirë se sa mendohej edhe pse kuqezinjtë ishin në superioritet numerik. Milani vuajti deri në fund për të marrë tri pikët dhe për të zgjidhur ndeshjen u desh një gjuajtje spektakolare e Benaser nga jashtë zonës për të çuar shifrat në 3-2, me golin e Ibrahimoviç në minutën e 90 që vulosi rezultatin 4-2 për kryesuesit e Serisë A.
Benaser e pranoi se ndonëse praktikohej, një gjuajtje e tillë ishte e vështirë për t’u realizuar.
“Ndoshta do të gjuaj 10 herë, por do ta bëj një gol të tillë vetëm një herë. Nuk u mendova gjatë, thjesht gjuajta. E kapa mirë, bëra një gol me peshë dhe ndaj jam i lumtur.
A më ndihmon boksi për koordinimin? Po, mendoj se duhet të jesh i ekuilibruar dhe pastaj duhet ta godasësh mirë. Të lëshosh këmbën. Por nuk di ta shpjegoj, është thjesht një gjë që e bën dhe kaq”, tha Benaser pas sfidës.
