Kosova vazhdon politikën e afrimit të lojtarëve të ri në ekipin përfaqësues teksa futbollisti i radhës që i është bashkuar dardanëve është 23-vjeçari, Toni Domgjoni.
Domgjoni është futbollist i lindur në Kroaci, por që është aktivizuar në të gjitha ekipet zinxhirë të Zvicrës. Ftesa për 23-vjeçarin erdhi këtë tetor në prag të dy sfidave që dardanët do të luajnë ndaj Suedisë dhe Spanjës, por ajo ccka nevojitej ishte leja e FIFA-s që lojtari të aktivizohej normalisht me përfaqësuesen kosovare.
Organi më i lartë i futbollit në botë e ka aprovuar kërkesën e Federatës Kosovare të Futbollit, dhe ishin këta të fundit që lajmëruan për inkuadrimin e Domgjonit te dardanët. Aktualisht mesfushori aktivizohet për skuadrën holandeze të Viteshes pas 3 viteve të kaluara në radhët e Zyrihut në Zvicër.
Postimi i FFK-së
Kombëtarja e Kosovës ka marrë një lajm të mirë në prag të udhëtimit për në Suedi në kuadër të kualifikimeve për Botërorin “Katari 2022”. Në fakt, FIFA e ka njoftuar sot FFK-në se kërkesa e saj për ndërrimin e kombëtares për mesfushorin e klubit holandez, Vitesse, Toni Domgjoni është miratuar dhe ai ka të drejtë të luajë për ekipin kombëtar të Kosovës.
