Ka startuar në orën 13:45, në “Selman Stërmasi”, dueli mes Tiranës dhe Laçit, i vlefshëm për javën e 4-t të Kategorisë Superiore.
Si bardheblutë e Orges Shehit, ashtu edhe kurbinasit e trajnerit Vukiçeviç, vijnë në këtë duel pas barazimeve respektive në javën e 3-të. Tirana ngeci ndaj Kastriotit, ndërkohë që Laçi mori një pikë të çmuar në minutat e fundit në sfidën ndaj Kukësit.
Në 3 javët e para Tirana ka grumbulluar 5 pikë, ndërkohë që bardhezinjtë vetëm 2 pikë. Përballja e fundit mes këtyre dy skuadrave daton më 17 maj të këtij viti, ku Laçi triumfoi në kryeqytet me rezultatin 0-1, pas autogolit të Najdovskit.
LIVE: TIRANA-LAÇI 2-0
Roganoviç 53′ (autogol), Ignjatoviç 75′ (autogol)
KOMENTI LIVE:
Përfundon takimi!
90′ Akordohen 3 minuta shtesë.
85′ Tirana menaxhon epërsinë e 2 golave, Laçi i pafuqishëm në sulm.
81′ Zëvendësim edhe te Tirana, largohet Totre, vendin e tij e merr Kuka.
79′ Dy zëvendësime te Laçi, largohet Deliu dhe Veliaj, në vend të tyre Qato dhe Bytyçi.
75′ GOOOOOL TIRANA 2-0/ Tjetër autogol i kurbinasve, kësaj here ishte kapiteni Ignjatoviç, i cili shtyu topin drejt rrjetës. Ishte Totre ai që provoi të shërbente drejt Ngosë, teksa i erdhi në ndihmë mbrojtësi i Laçit.
73′ Laçi pranë golit të barazimit, me anë të Guindo, tentantiva e sulmuesit me kokë, devijohet në këndore nga Bekaj.
71′ Zëvendësim te Tirana, largohet nga fusha e lojës, Redon Xhixha, vendin e tij e merr Përgjoni.
69′ Najdovski është i ndëshkuari i radhës me karton të verdhë.
67′ Moment i rrezikshëm në zonën e Tiranës, por mbyll mjaft mirë Hoxhallari, që nuk lejon që topi të filtrojë në qendër të zonës.
59′ Pranë golit të dytë Tirana me Seferin, por gjuajtja e sulmuesit, ndalet nga portieri Dajsinani. Tenativa e sulmuesit ishte qendrore.
56′ Zëvendësim te Laçi largohet Lushkja dhe Mazrekaj, në vend të tyre Zylfiu dhe Ademi.
53′ GOOOOOL TIRANA 1-0/ Zhbllokohet sfida, bardheblutë e Orges Shehit në avantazh. Pas një harkimi të Seferit nga e djathta, Roganoviç shkakton autogol duke shtyrë topin drejt rrjetës.
46′ Starton pjesa e dytë, trajneri Shehi kryen menjëherë zëvendësim, largohet Toli i ndëshkuar me karton të verdhë, në vendin e tij Toshevski.
Mbyllet pjesa e parë.
45′ Akordohet 1 minutë shtesë.
44′ Toli ndëshkohet me karton të verdhë për ndërhyrje të gabuar ndaj Mazrekajt.
40′ Tirana kërkon të avancojë përpara, në kërkim të golit të avantazhit, por e vendosur mirë mbrojta e Laçit që nuk lejon hapësira në prapavijë.
34′ Sa pranë golit Laçi, me Guindo, i cili merr një asist fantastik nga Mazrekaj, teksa provon me kokë brenda zonës, por nuk devijon siç duhet.
33′ Aksion mjaft i bukur për Laçin, Roganoviç shërben mjaft bukur brenda zonës për Zarubicën, i cili provon fluturimthi, por tentativa e tij shkon jashtë kuadratit.
30′ Dajsinani bën heroin, duke i mohuar një gol të sigurt, Ismajgecit. Vendimtare ndërhyrja e gardianit të Laçit. Goditje këndi për Tiranën.
22′ Kërcënon sërish Tirana me Seferin, që gjuan me të majtën nga jashtë zonës, topi shkon mbi portën e mbrojtur nga Dajsinani.
19′ Provon Laçi rrezikshëm me Deliun, që lëshon një predhë nga distanca, tentativa e mesfushorit shkon ngjitur me shtyllën e portës së mbrojtur nga Bekaj.
11′ Tirana kërkon 11-metërsh pas përplasjes së Dajsinanit me Seferin brenda zonës. Për gjyqtarin Shahini gjithçka e rregullt, teksa loja vijon normalisht. Ndëshkohet Seferi me karton të verdhë.
8′ Tirana më kërkuese në këto minuta, teksa Laçi mbrohet mirë, duke mos lejuar hapësira.
3′ Tirana gjen rrugën e rrjetës me Ngo, por më herët gjyqtari anësor kishte analizuar pozicion jashtë loje. Nuk vlen goli.
1′ Starton sfida në “Selman Stërmasi”, topin e parë nga qendra e luajnë bardhezinjtë e Laçit.
