Nëse sheh me kujdes kontigjentin e futbollistëve të Dinamos vë re se shumë prej tyre luajnë me këmbën e majtë. Përveç Aleksandër Isaevskit dhe Ali Samakes, që janë tipikë mëngjarashë, sepse janë mbrojtës të krahut të majtë, te blutë “sallaksit” përbëjnë gjysmën e formacionit.
Edhe qendërmbrojtësi Eni Imami luan me këmbën e majtë. Po ashtu, edhe Besir Demiri, të cilin trajneri Shkëmbi ka vendosur ta aktivizojë në qendër të mesfushës. Kapiteni Agim Ibraimi është një tjetër mëngjarash, ndërkohë që edhe Enis Gavazaj ka të majtën këmbën e tij të preferuar.
Mund të jetë thjesht një rastësi, por në futboll thuhet se ekipi merr “fytyrën” e trajnerit dhe Bledi Shkëmbi, një “sallaks” i thekur duket se ka vendosur që edhe Dinamos së tij t’i japë nuanca të majta.
