Gjatë ndalesës së kombëtareve, Mauricio Sarri pati mundësi të reflektojë për ndryshimet që mund të bëjë te Lacio e tij. E sigurt është mungesa e Açerbit në prapavijë dhe këtu Patrik duket më i avantazhuar se Radu.
Sidoqoftë, problemi më i madh ka të bëjë me portën. Reina ka qenë titullar, por tashmë nuk e ka më vendin e sigurt. Në këto rrethana, përfituesi mund të jetë Thomas Strakosha.
Shqiptari ka koleksionuar vetëm dy prezenca sivjet nga 11 të mundshme. Ai ka qenë titullar vetëm në Ligën e Europës, teksa nuk i ka shijuar ende emocionet e Serisë A në turneun aktual.
PLANI – Sarri mendon t’i besojë ndaj Interit pavarësisht se momenti është delikat. Stakosha dhe Reina kanë një garë të brendshme edhe për çështje të lidhura me kontratat.
Të dyve u përfundojnë akordet respektive me klubin në fund të sezonit e që nga janari do të jenë të lirë të firmosin me kë të dëshirojnë. 26 vjeç, portieri shqiptar cilësohej si e ardhmja e portës bardhekaltër deri pak kohë më parë.
Klubi do të mundohet t’i rrëmbejë firmën për rinovimin, por diçka e tillë nuk mund të ndodhë pa siguri teknike. Reina, ndërkohë, po shkon drejt të 40-ave dhe nuk ofron garanci afatgjata, ndaj zgjedhja e Sarrit mund të jetë e ndikuar edhe nga planet e klubit për Strakoshën, i cili mbron portën laciale prej thuajse gjashtë sezonesh.