Ishte një Hansi Flik më i lumtur se kurrë dhe kjo me të drejtë pas asaj fitoreje të merituar edhe pse të stërmunduar ndaj Rumanisë. Hamburgu ishte dëshmitar i një sfide e cila prodhon rrallë një futboll të tillë. Trajneri gjerman tha pas ndeshjes se ishte një nga paraqitjet më të mira të skuadrës së tij që kur ka marrë drejtimin e “Pancerave”.
“Jam shumë i lumtur pasi për mënyrën se si po luanim nuk meritonim të humbisnim. Çfarë reagimi nga skuadra, një bravo e madhe të gjithëve edhe pse gabuam në disa raste duke lejuar kundërshtarin t’i afrohej zonës. Goli i parë mund të evitohej”, tha 56-vjeçari. I pyetur nëse kualifikimi ishte siguruar, ai tha:
“Kemi ende ndeshje për të luajtur dhe mendoj që nuk duhet të mendojmë kurrsesi që jemi kualifikuar. Sigurisht që ishte një hap i madh drejt Botërorit, por ende nuk kemi siguruar gjë matematikisht dhe deri atëherë nuk preferoj të flas për këtë gjë.
Tani kemi një ndeshje delikate në Maqedoninë e Veriut të cilën do ta vlerësojmë maksimalisht, të gjithë e dimë se si përfundoi ndeshja e parë”, përfundoi Flik.
