Te kuqezinjtë, çështja e rinovimit të Frenk Kesit vazhdon të mbetet në rend të ditës dhe sa më shumë kalon koha, aq më shumë palët distancohen. Klubi nuk do të kapet i papërgatitur në rast se lamtumira e afrikanit bëhet realitet dhe për këtë arsye ata po monitorojnë tregun për të gjetur një zëvendësues të mundshëm.
Paraprakisht, një strategji e ngjashme me atë që solli Majk Menjanë te Milani, kur u kuptua se Xhixho Donaruma nuk do të rinovonte.
PLANI I RI
Një emër që po bëhet veçanërisht i nxehtë është ai i Renato Sançezit, mesfushorit të Lilës. Siç shpjegon “La Gazzetta dello Sport”, portugezit i skadon kontrata në 2023 dhe është në kërkim të një sfide të re për të ardhmen e tij. Drejtuesit e “Djallit” kanë kohë që i kanë vënë sytë te djaloshi i lindur në 1997.
Milani së shpejti mund t’u japë një përshpejtim të rëndësishëm negociatave, duke përfituar edhe nga marrëdhënia e shkëlqyer me Lilën, siç dëshmohet për shembull nga marrëveshja për Menjanë disa muaj më parë apo ajo e vitit të kaluar për Tiago Djalon. Kuqezinjtë po vazhdojnë me drita të fikura, por pa dyshim që kanë pasur kontakte me Zhorzh Mendes, menaxheri i Sançezit që po përpiqet të sjellë klientin e tij në një klub të nivelit të lartë.
Vlera e tij është 30 milionë euro, por duke pasur parasysh situatën kontraktuale, ai mund të largohet nga Franca për shumë më pak, teksa paga bruto e lojtarit do të peshonte 5.5 milionë euro në arkat kuqezi.
NJË ZIKALTËR
Sipas lajmeve të fundit, Milani ka shfaqur interes për Danilo D’Ambrozion. I lindur në vitin 1988, mbrojtësi napolitan ishte kërkuar tashmë nga kuqezinjtë disa muaj më parë. Ai ka një kontratë që skadon në qershor dhe Interi nuk duket i gatshëm ta rinovojë atë.
E vërtetë që po flasim për një lojtar të pjekur, por ai mund të jetë i dobishëm edhe si mbrojtës i djathtë dhe i majtë. Me kalimin e viteve, ai ka mësuar të luajë edhe në qendër, në mbrojtjen me tre lojtarë ashtu edhe në atë me katër.
33-vjeçari gjithashtu shënon shpesh gola. Kjo pistë do të mbahet në konsideratë të fortë për verën në rast se Alesandro Florenci nuk blihet përfundimisht nga Roma.
