Derbi i Manchesterit vishet blu. Rezultati 2-0 në favor të skuadrës së Pep Guardiolës u vendos qysh në pjesën e parë. 45 minutat e dyta nuk iu mjaftuan “Djajve të Kuq” për të evituar disfatën, ndërsa “qytetarët” menduan më shumë të mbronin avantazhin e qartë.
Ndeshja e shumëpritur u zhbllokua qysh në minutën e 7-të nga një autogol i Bailly. Kjo ishte goditje psikologjike për skuadrën e Manchester United, e cila reagoi, krijoi volum loje, por i mungoi finalizimi.
I etur për të barazuar, Manchester United krijoi hapësira prapa, çka u shfrytëzua më së miri nga kundërshtari në fund të pjesës së barë. Pikërisht në minutën e 45-të, B.Silva do të shënonte golin e dytë dhe të sigurisë për të tijtë.
Pjesa e dytë ishte një dialog i gjatë mes sulmeve pa efikasitet të vendësve dhe qasjes difensive të “qytetarëve”. Këta të fundit i bënë hyzmetin fitores së siguruar qysh në pjesën e parë, pa kaluar më në aventurë. Dhe në fund ia dolën të merrnin tri pikë të çmuara nga derbi i ethshëm i Manchesterit.
Duhet evidentuar një fakt domethënës: Manchester United tani ka 14 ndeshje radhazi në shtëpi, pa e mbajtur dot portën të paprekur. “Djajtë e Kuq” kanë pasur vetëm një seri më të gjatë në të gjithë historinë e tyre, pa portë të paprekur në shtëpi (21 ndeshje) midis prillit 1958 dhe marsit 1959.
Pas kësaj përballjeje direkte, skuadra e Guardiolës kap vendin e dytë për momentin, me 23 pikë, ndërsa Manchester United pozicioniohet p pesti, me 17 pikë aktualisht. Të dyja këto pozicione në klasifikim mund të revizionohen pas zhvillimit të ndeshjeve të tjera të kësaj jave në Premier League.